„Du gsesch guet us!“
 
„Du gsesch guet us!“
Das ghör ig ir Letschti so viu wie no i mim ganze Läbe.
De luegsch s’ganze bishärige Läbe lang druuf, wottsch e chli einigermasse derhär cho,
rasiersch u frisiersch, probiersch u ghörsch nüt i die Richtig.

Nüt!!!! Aber grad gar nüt!

U jetz plötzlich git’s wie usem Nüt use Komplimänt!
Vo Lüt wonig niemals dänkt hätti, dass sie mis Ussehe überhoupt taxiere!
Es gheie mir Lüt ume Hals, dass i mängisch fasch nümm zum Schnuufe chume.
U derbi hani weder Gremene no Püderli uftreit, tränke mi nid i Parfumwulchene u ziere mi nid mit Piercings oder Tattoos, no han ig irgendwelchi Botoxereie hinger mir! Ha immer no die gliiche Chleider an u die gliichi Frisur!
Aber es isch no es cheibe guets Gfüehl
Chönnt mi no dra gwöhne. ??Doch wie seit me so schön:
 
Wahri Schönheit chunnt vo inne!
 
Ja, u dert hanig i de letschte zwöi Jahr e chli la nachehälfe!
Me het’s mir empfohle und as Härz gleit!
Hätti’s nie für müglich ghalte, dass sich das so positiv uswürkt.
Es tuet würklich guet, we me seit, was me dänkt und a was me sich fröit
Drum:
Schön, sit Dir da u heit e Guete
 
Mit eme liebe Gruess vom guetussehende Markus
natürlich ou vom so besser ussehende Roli u de beschtussehendschte Mitarbeiter