Es isch churz u git warm!
E typischi Anekdote us em Löie
Sunntig Aabe, Füf vor Füfi, si aui chnüttu u fröie sich ufs Apero, geits Telefon:
«Jo do isch dFrou Soundso. Mir si hüt zmittag bi Öich cho ässe u do hei mir es Foulard vergässe». «Jo, wo sit Dir de gsässe» frog i. «Wüsst Dir, grad we me ine chunnt linggs am erschte Tisch am Fänschter». Okay, Tisch elf, alles klar! I go go luege u finge keis, go zrügg as Telefon u säge das. «Jä, aber mou! Mi Kollegin het gseit, es müess bi Öich si. Göht go luege, es isch sicher ir Garderobe blibe hange». Do frog i afe einisch, wie de das Foulard usgsengi. «Ehmmm, wartet, was het sie gseit? Ah jo: es isch churz u git warm» (!!???!!). «Jä weli Farb hets de?». «Das het sie nid gseit, weiss es nid, aber göht jetz go luege u we Dirs finget, müesst Dir’s ihre zueschicke!».
De gohn i haut, de het die Frou ihre Friede u es isch, wen wundert’s, haut o kes Foulard ir Garderobe. Go zrugg, mit eme trochne Hals, ghöre die angere sich zueproschte uf der Terrasse und ig säge dere Frou: «Mir heis leider nid». «Jä mou, mini Kollegin het gseit» protestiert die Frou am Telefon und ig falle ihre mit liecht ungeduldigem Ungerton is Wort: «Säget doch dere Kollegin, sie söu säuber alüte!». «Jä nei, es muess bi Öich si u de müesst Dirs de schicke. Uf der Toilette isch sie ou gsi. Göht go luege!» Langsam riisst mir der (Foulard-)Geduldsfade und i wott grad säge, sie söu sich doch säuber eis lisme, do ghör ig am angere Ändi vom Telefon e Mannestimm, wo seit: «I ha’s gfunge, Eusi! Es isch bi üs im Outo fürecho». «Was meinsch? Ungerem Sitz gsi? Auso, nei ou! Dasch e Babe! De söu sies halt zu üs hei cho hole. Wiederluege Herr Meier».
Kes Danke, kes Sorry, eifach uf Wiederluege!!! Ig ha der Hörer ir Hang,
cha grad nüt säge, wott mi ufrege u mache wieder numme ei Bewegig:
Aruefbeantworter ein!
Go uf Terrasse, nimme es Glas mache Gsundheit u verzeue schmunzelnd, was passiert isch. Passiert das numme mir???
E Guete
Markus Meier, Roland Steiner
u Mitarbeiter